A Alcaldesa de Lugo, Lara Méndez, cumpriu hoxe coa tradición de compartir a mañá previa ao Día de Reis cos 55 usuarios a usuarias do centro municipal de día Novo Antonio Gandoy, visita na que a acompañou a concelleira de Maiores, Olga López Racamonde, e na que aproveitaron para desexarlles un Feliz Aninovo.

Como tamén é tradición, a rexedora obsequiou aos usuarios un agasallo doce -composto por turrón, mazapán e améndoas-, e mantivo un animado encontro escoitando e interactuando cos maiores do centro.

Neste senso, a rexedora lembrou que desde o Novo Antonio Gandoy, o Concello ofrece un servizo público dirixido a toda a poboación maior do termo municipal, no que son unha prioridade todos aqueles cidadáns que, polas súas eivas físicas ou mentais, socioeconómicas ou familiares, teñan reducida a súa autonomía para as actividades básicas e/ou instrumentais da vida diaria. Nesta estratexia de atención xerontolóxica adquire unha especial relevancia as accións destinadas á socialización e participación dos maiores, grupos de diálogo e fomento das relacións interpersoais, o encontro con outros colectivos e a planificación de actividades comúns.

Lara Méndez e Olga López puxeron en valor o gran traballo que está a levar no Centro de Día e aseguraron que “se seguirá a traballar desde a solidariedade e o compromiso cos nosos maiores e con aqueles que os coidan, pois se merecen todo o noso respecto, agarimo e apoio”.

Baile de Reis

A rexedora aproveitou tamén para convidar aos presentes a celebración maña dun baile especial polo Día de Reis no centro social da Milagrosa, en horario das 16.30 ás 20.00 horas.

Xa o sábado, día 7, e o domingo, día 8, serán os tres centros habituais os que acollerán os bailes da terceira idade como todas as fins de semana: A Milagrosa, Díaz Castro e Maruja Mallo, no seu horario habitual, é dicir, das 16.30 ás 20.00 horas.