A Concelleira de Benestar Social e Igualdade, Ana González Abelleira, deu a coñecer esta mañá os datos das actividades socioculturais que se levaron a cabo ao longo do 2013 e que son unha aposta polo ocio saudable e a aprendizaxe de habilidades sociais.

Desta maneira, durante o ano 2013, leváronse a cabo 238 talleres de diferente índole, tanto nos centros de dinamización rural como nos centros de convivencia da cidade, dos que se beneficiaron 11.778 persoas, “case un 12% da poboación de Lugo” segundo González Abelleira.

“O Concello aposta por seguir prestando este servizo que é moi útil para que evitar que moitas persoas se sintan soas e na zona rural permite que os veciños e veciñas se socialicen e compartan novas experiencias” e sinalou que “cada vez teñen máis demanda”.

Compre sinalar que o perfil maioritario dos usuarios destas actividades é dunha muller, son o 85% do total, de entre 51 e 65 anos que demanda actividades psico-físicas e manualidades. Nas actividades dirixidas para menores de 14 anos destaca un 60% da nenas e un 40% de nenos. Estas actividades teñen un orzamento de preto de 200.000 euros.

A responsable da área de Benestar sinalou como obxectivos das actividades socioculturais a promoción e dinamización e a implicación da cidadanía na posta en marcha de iniciativas de prevención e mellora da cohesión social ademais de que “supón un incentivo contra o sedentarismo e o aislamento nunha poboación que se caracteriza polo alto número de persoas maiores, moitas delas que viven sos”.