O Servizo de Prevención de Drogodependencias da Concellería de Muller e Benestar Social do Concello de Lugo, levará a cabo o III Curso de Monitores dende a Prevención: o Mediador Xuvenil en Educación para a Saúde; a prevención das drogodependencias, os venres de 16:00 a 21:00 horas e os sábados de 9:00 a 14:00 horas, entre o 28 de marzo e o 19 de abril, no Centro Social Uxío Novoneyra.

Esta actividade trata de centrar ó mediador na perspectiva de axente social comunitario en educación da saúde e,sobretodo, na prevención de drogodependencias. Trátase de dotar ós mediadores de habilidades e competencias para a organización e densenvolvemento de actuacións preventivas no medio habitual da poboación destinataria da acción.

O Concello de Lugo considera absolutamente necesaria a formación de mediadores xuvenís para levar a cabo proxectos de intervencion na área de prevención. Neste caso trátase dunha formación orientada a formar persoas cualificadas para traballar na Promoción da Saúde, especialmente na Prevención das Drogodependencias no ámbito da mediación xuvenil, pois este tipo de traballo vai dirixido a grupos de poboación sometidos a situacións de risco capaces de xerar ou incrementar problemáticas con respecto á comunidade e a sí mesmos.

Para alcanzar estes ambiciosos obxectivos, a formación conterá dunha carga teórica de 40 horas presenciais, e unha formación práctica cunha carga de 20 horas.

Diríxese a persoas cunha idade comprendidade entre os 18 e os 30 anos, dándose prioridade a aquelas vinculadas ó ámbito socioeducativo dende a prevención das drogodependencias.

O total das prazas existentes será de 25, tendo prioridade na matrícula a orde de inscrición e as características antes citadas.

Os interesados poderán realizar a súa inscrición a partir do 3 de marzo nas Oficinas do Servizo Municipal de Prevención de Drogodependencias sito no 3º andar do Centro Social Uxío Novoneyra. Pódese obter máis información no teléfono 982 297 498.