A Concelleira de Educación, María Dolores Vieiro, e o Director da Aula de Formación Teatral, Guillermo Cancelo, presentaron esta mañá o programa da nova edición desta actividade.

Un total de 86 alumnos participaron o ano pasado nesta aula de formación. Deles 38 nos grupos de adultos e 48 alumnos máis nos centros escolares que pertencían aos tres institutos adscritos ao programa, IES Leiras Pulpeiro, o CEIP As Mercedes e o Colexio de educación especial Santa María, este último, non so traballou cun grupo na formación teatral senón que tamén tivo un grupo destinado a creación de máscaras e monicreques.

Entre todos realizaron diferentes representacións en espectáculos diferentes, entre os que destaca Regalamos abrazos, as Xornadas de Concienciación contra o Acoso Escolar, ou as Xornadas Escénicas.

Así mesmo, o luns día 12 de novembro dará comezo unha nova edición da aula de formación teatral. A Aula de formación de adultos desenvolverase este ano no Centro Social de Fingoi e da Milagrosa dúas tardes á semana durante dúas horas.

No caso dos centros de ensino o número de participantes aumenta. Pásase de catro grupos de rapaces a un mínimo de 7 que traballarán un día á semana durante dúas horas. Xa está confirmada a participación na actividade dos centros de Educación Infantil: Fingoi 2, Casas, e Sagrado Corazón; de Primaria: CEIP Anexa e CEIP As Mercedes; de Educación Especial: Santa María. Quedan pendentes de confirmación os grupos que se están formando no IES Leiras Pulpeiro, IES Xoán Montes e IES Virxe dos Ollos Grandes.

Novidades na Aula

A Concelleira de Educación avanzou as novidades que presenta a edición desde ano de Aula de Formación Teatral. Realizaranse tres cursos intensivos de formación teatral con distintos profesionais do ámbito galego e nacional entre xaneiro e marzo.

Haberá un curso de Clown de 20 horas repartidas en tres días consecutivos impartido polos lucenses Iván Pardo e Fran Rei, membros do grupo Os sete magníficos máis un.

Ademais os participantes poderán asistir a un curso de escenografía teatral e a un curse de creación de máscaras e monicreques.