A Concelleira de Cultura, Turismo, Xuventude e Promoción da língua, Carmen Basadre, mantivo este xoves un encontro cos participantes nas actividades gratuítas de verán da Casa das Linguas, unha programación posta en marcha polo Concello para favorecer a conciliación laboral e familiar e abrir alternativas de lecer aos máis cativos ao longo do verán. As actividades, que arrincaron o pasado luns, terán lugar ata o 28 de xullo, nunha primeira quenda, e do 1 ao 31 de agosto, nunha segunda quenda, de luns a xoves.

Durante o encontro, Basadre interesouse polas aprendizaxes dos nenos e nenas ao tempo que subliñou a importancia de aprender novos idiomas, e de facelo en idades temperás.

No centro da Estrada da Granxa, os luns e mércores de 10:30 a 13:30 horas, está programado un Summer Camp de inglés, alemán e francés. Os martes e xoves, de 10:30 a 13:30, terá lugar un taller de animación á lectura. Polo que respecta ao centro de María Balteira, os luns e mércores, de 10:30 a 13:30 horas, celebrarase o taller de animación á lectura e os martes e xoves, de 10:30 a 13:30 horas, terá lugar o Summer Camp de inglés e francés.