A alcaldesa de Lugo, Lara Méndez e o edil de Xuventude, Mauricio Repetto, entregaron esta tarde os diplomas aos mozos e mozas que participaron nos cursos de Manexo de carretillas elevadoras e de Carnicería, corte e elaboración de produtos cárnicos, dentro da programación municipal do Fórma-T Xa!

Unha iniciativa coa que o Goberno de Lara Méndez buscaba mellorar a empregabilidade da xente máis nova, incrementando a través desta formación, as súas posibilidades de acceso ao mercado laboral.

“Neste momento resulta máis necesario que nunca impulsar políticas de emprego e axudar á veciñanza, especialmente á mocidade, a adquirir coñecementos que serán chave na búsqueda activa de emprego, nun contexto tan complexo como o da recuperación na etapa da post- pandemia na que se agravou, aínda máis, a vulnerabilidade da xuventude para optar a un posto de traballo”, destacou a rexedora.

Durante o acto, a alcaldesa felicitou e desexou moita sorte no seu futuro laboral ás e aos participantes nestes dous cursos, que se suman aos xa concluídos sobre Manipulación de Alimentos, Control de Alérxenos na industria alimentaria e Corte de Xamón.

Pola súa banda, o concelleiro da área, Mauricio Repetto destacou que o programa posibilitou que medio cento de rapaces e repazas, con idades comprendidas entre os 18 e os 35 anos, recibiran formación específica en consonancia coas necesidades detectadas nalgúns sectores como o agroalimentario e de servicios, onde Xuventude detectou unha demanda de profesionais non satisfeita.

“Ofrecemos así un total de seis accións formativas a través dun deseño Dual que aborda unha parte teórica e outra práctica e que inclúe ademais, unha vez finalizadas as clases, un seguimento e asesoramento específico a todas estas persoas para orientalas na búsqueda de emprego”, afirmou o edil que tamén quixo trasladarlle os seus parabens ao alumnado do Fórma-T Xa!.