O concelleiro responsábel de Infraestruturas Urbanas, Alexandre Penas, trasladou á Xunta de Galiza a reclamación da veciñanza de Castelo para acondicionar a marquesiña do transporte público. Penas explicou que "esta marquesiña foi instalada pola Xunta e o seu mantemento corresponde a esta administración, malia que sexa utilizada para o transporte urbano", explicou Alexandre Penas, que engadiu "trátase de que cada administración se faga cargo das súas responsabilidades, do mesmo xeito que o Goberno de Lugo habilita e asume o mantemento de paradas para o transporte interurbano onde é necesario".

A propia Lei 8/2013, de Estradas de Galiza, define como Dominio público viario ás estradas de titularidade da Comunidade Autónoma ou das entidades locais de Galiza e os terreos ocupados polos elementos funcionais destas estradas. As marquesiñas son consideradas como un elemento funcional, polo que o seu mantemento corresponde tamén á Xunta de Galiza.

"Seguimos traballando na ampliación do mobiliario urbano, escoitando sempre as solicitudes da veciñanza e buscando a mellora da imaxe da cidade", afirmou Alexandre Penas, que engadiu "agardamos axilidade por parte da Xunta de Galiza á hora de asumir unha intervención da súa responsabilidade, garantindo que unha zona cunha ampla densidade de poboación non perda servizos".

Audio

• O concelleiro de Infraestruturas Urbanas, Alexandre Penas, sobre a marquesina de Castelo | Descargar mp3 [1]