O Tenente de Alcalde, Rubén Arroxo, visitou no día de hoxe xunto ao concelleiro de Infraestruturas, Alexandre Penas, o inicio das obras da avenida Filharmónica Lucense, onde se está a colocar iluminación dende as pistas de atletismo até a piscina municipal.

Dende a concellería de infraestruturas investiranse un total de 31.157,85€, que se destinarán á instalación de 8 luminarias LED de 63W que, segundo Rubén Arroxo, “consumen aproximadamente un 60% menos que a iluminación convencional”. O concelleiro nacionalista indicou que “se partirá do cadro de alumeado existente, que se ampliará segundo sexa preciso, ademais, realizaranse as canalizacións que sexan necesarias” e lembrou que “esta actuación leva tempo a ser solicitada polas usuarias das instalacións da contorna”.