O Tenente de Alcalde do Concello de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, mantiveron unha reunión co director Cristóbal Soler para comezar a organización da IV Edición do Lucus Music Festival. O evento consolidouse como unha referencia no panorama musical e formativo, reunindo en cada edición centos de asistentes nos seus concertos e actividades.

Maite Ferreiro destacou que o festival manterá o seu carácter multidisciplinar, combinando actuacións abertas ao público con formación especializada para futuras directoras e directores. “O Lucus Music Festival consolidouse como unha cita imprescindible do verán lucense, enriquecendo a oferta cultural da cidade e favorecendo a participación cidadá a través da música”, sinalou.

A concelleira de Cultura subliñou tamén a proxección internacional do festival, que cada ano reúne en Lugo a directoras, directores, músicos e intérpretes de diferentes partes do mundo. “O Lucus Music Festival converte a cidade nun espazo de encontro da música e da cultura, reforzando o seu posicionamento como referente no ámbito musical e formativo”, afirmou a Ferreiro.

Cristóbal Soler, que volverá exercer como director artístico e profesor de dirección, destacou a importancia de xerar oportunidades de formación para novos talentos musicais, que terán ocasión de demostrar o aprendido en actuacións abertas ao público.

O festival contará cunha programación de concertos gratuítos en espazos emblemáticos da cidade, como a Praza Anxo Fernández Gómez, a Casa do Saber, a Praza Maior, o Vello Cárcere e a Igrexa de San Pedro.

A Área de Cultura reafirma así o seu compromiso coa difusión e promoción da música, consolidando o Lucus Music Festival como unha referencia imprescindible tanto a nivel nacional como internacional.