O Tenente de Alcalde e concelleiro responsábel da área de Mobilidade e Infraestruturas, Rubén Arroxo, informou que nos vindeiros días dará comezo a construción da rotonda de San Eufrasio. Arroxo explicou que “con esta nova infraestrutura melloraremos o funcionamento e a seguridade, eliminando un dos puntos negros máis importantes cos que conta Lugo na actualidade”, e engadiu “a rotonda eliminará os distintos xiros á esquerda que se teñen que realizar actualmente, e aumentará a distancia de visibilidade”

O persoal técnico da área de Mobilidade deseñou un plan de tráfico alternativo “que permita á veciñanza acceder ás rúas afectadas polas obras sen interferir co desenvolvemento dos traballos“, segundo explicou Rubén Arroxo. Coas modificacións, que serán temporais mentres se execute a construcción da rotonda, as persoas que circulen desde a praza Conde de Fontao ata San Eufrasio terán que desviarse pola rúa Castelao, Miguel de Cervantes, e ronda das Fontiñas, accedendo a San Eufrasio polo Carril dos Indios. O tráfico de entrada á cidade que chegue por San Eufrasio, será desviado polo Carril dos Indios cara a Ronda das Fontiñas.

A área de Mobilidade e Infraestruturas investirá 107.871,50€ na construcción desta rotonda. Rubén Arroxo anunciou que “a rotonda estará rematada nun prazo inferior aos 6 meses estimados orixinalmente”, e explicou que “durante o desenvolvemento dos traballos, tanto desde a empresa concesionaria como desde a área de Mobilidade tratarase de reducir ao máximo as molestias producidas á veciñanza”.