O Tenente de Alcaldesa, Rubén Arroxo, recibiu na Casa Consistorial a un grupo de estudantes de 2º Ciclo do Colexio Franciscanos de Lugo. Durante a visita, Arroxo explicou o funcionamento da Administración e o papel da veciñanza nela, e amosarou as distintas instalacións da Casa Consistorial, na praza Maior, como o Salón de Plenos ou os conxuntos escultóricos adquiridos polo Concello e expostos permanentemente na sede municipal.

Temas como a mobilidade, as festas ou a programación cultural da cidade foron os protagonistas das dúbidas achegadas polas nenas e nenos que realizaron a visita. O Tenente de Alcaldesa manifestou a súa satisfacción por recibir esta visita no Concello, e animou aos centros educativos de Lugo a programar máis visitas á Casa Consistorial.

Unha vez situados no Salón de Plenos, as e os estudantes organizáronse en diversos grupos e simularon un pequeno Pleno onde realizaron propostas como a creación dun parque acuático, un parque natural ou unha tirolina. Ao rematar, as e os escolares tamén puideron visitar os restos dun templo romano ubicados dentro da propia Casa Consistorial.