A Alcaldesa de Lugo, Lara Méndez, e membros da Corporación municipal asistiron este martes no MIHL á presentación do primeiro disco realizado polo alumnado da Escola Municipal de Música de Lugo. Este disco conta cunha duración de preto de 52 minutos e con 17 temas, entre os que se atopan O Carro, Let Me Wait, Argallada de San Froilán, Rumba de Ramiro, ou Over My Head, entre outros.

A rexedora destacou “o traballo de todos os alumnos e alumnas, así como do profesorado desta escola, que fixo un importante esforzo para conseguir sacar adiante este primeiro disco”. Así mesmo, a Alcaldesa amosou “o orgullo tanto do Goberno municipal como da Corporación polo éxito acadado pola nosa Escola de Música, que a día de hoxe conta con máis de 700 alumnos e 1.000 matriculados, ademais de ter unha lista de espera de 400 persoas”.