A alcaldesa de Lugo, Lara Méndez, acompañou hoxe ao equipo da Policía Local que participará no reto solidario de acadar a primeira Volta a España Running por etapas Non – Stop cruzando todas as capitais de provincia españolas, nun desafío de máis de 7.000 quilómetros co que se superaría o actual Record Guinness da carreira máis longa deste tipo.

O obxectivo é recadar fondos e dar visibilidade á Fundación Inversión Duplicación do Cromosoma 15Q a través da que se promove a investigación deste síndrome co fin de obter unha futura curación da enfermidade, atopar medicamentos axeitados que minoren os síntomas e mellorar a calidade de vida das persoas afectadas, así como favorecer a súa integración social.

A rexedora, xunto ao Intendente, Jesús Piñeiro e a familia de Pedro, un neno de Sarria, de 27 meses, afectado por esta doenza, trasladou o seu ánimo aos 7 axentes da Xefatura lucense que realizarán o percorrido dende A Fonsagrada, de onde sairán o sábado ás 23:00 horas, ata Guitiriz ao que chegarán na tarde do domingo, cruzando así a provincia de Lugo.

“Para a veciñanza de Lugo é un orgullo que a Policía Local amose a súa vertente máis solidaria sendo parte activa dunha competición tan esixente, especialmente pola meta que persegue: a de dar visibilidande a unha patoloxía aínda pouco coñecida e na que cómpre dar pasos e seguir avanzando para mellorar a súa abordaxe e tratamento. Dende o Concello de Lugo enviámosvos todo o noso apoio e forza para que vos acompañe durante a proba”, afirmou Lara Méndez.