A Alcaldesa de Lugo, Paula Alvarellos, acompañada polo Tenente de Alcaldesa e Delegado da Area de Xestión integral de Recursos Internos, Pablo Permuy; deu a benvida esta mañá a sete funcionarios que hoxe fixeron efectiva a toma de posesión nos seus respectivos cargos. Trátase dunha administrativa de Intervención Xeral, unha administrativa de Planeamento, unha administrativa de enxeñería, un administrativo do órgano de Orzamentación e Contabilidade, unha administrativa de electromecánicos, un administrativo de Fomento e unha administrativa de Educación. Todos os postos foron cubertos mediante sistema de concurso-oposición en quenda de promoción interna.

A promoción dos sete traballadores e traballadoras supón un significativo reforzo para os servizos que presta o Concello de Lugo, que redundará nunha mellor atención a toda a veciñanza. A rexedora felicitou aos administrativos e administrativas “por unha promoción realmente merecida deste grupo de moi bos e boas traballadoras da casa, cos que tiven a fortuna de traballar, e dos que estou segura que continuarán dando un gran servizo a todas e todos os lucenses”.