A alcaldesa de Lugo, Paula Alvarellos, e a responsable de Cohesión Territorial, Ana González Abelleira, mantiveron un encontro cos pedáneos e pedáneas do municipio para tratar diversos temas de interese para as zonas rurais do concello. Durante a reunión de traballo, que se levou a cabo no salón de actos do Centro de Convivencia de Fingoi, a rexedora destacou a importancia desta figura no funcionamento da Administración local. “O papel dos pedáneos é fundamental na xestión municipal e clave para o desenvolvemento do noso rural. Por iso, consideramos vital intensificar esa relación e poñer en valor este posto e a súa función como interlocutores e altofalantes da comunidade”, asegurou Alvarellos Fondo.

Así, a rexedora anunciou que o próximo 15 maio, coincidindo co Día do Mundo Rural e a celebración de San isidro Labrador, o Goberno local organizará un acto de homenaxe a esta figura na Casa Consistorial. “ Trátase dun recoñecemento a todos e cada un dos pedáneos que este ano estará personificado na traxectoria de Servando Escolante Peteiro, pedáneo de Esperante, quen faleceu recentemente, e na lonxevidade de Dositeo Devesa Lorenzo, de Orbazai, quen aos seus 92 anos leva 42 exercendo esta responsabilidade. O noso obxectivo é expresar o enorme agradecemento a este grupo de veciñas e veciños”, explicou Alvarellos.

Pola súa banda, González Abelleira, entre outros asuntos, comunicou as melloras que se implementarán no funcionamento dos locais veciñais co obxectivo de optimizar o seu funcionamento e dar cabida á intensa actividade destes puntos de encontro. “Buscamos unha mellor coordinación desta rede de locais para así evitar que exista coincidencias na programación e se solapen as horas de uso naqueles con máis actividade e, do mesmo xeito, dinamizar aqueloutros que, por diferentes motivos, son menos visitados pola veciñanza da zona”, concluíu a edila.