Os nenos e nenas do colexio público Quiroga Ballesteros gozaron este martes dunha actuación do ciclo de Concertos Didácticos que ofrece a Escola Municipal de Música nos centros educativos de Lugo. A esta nova cita coa música asistiron a Alcaldesa, Lara Méndez, e a Concelleira de Benestar Social, Igualdade e Inclusión, Ana González Abelleira, que compartiron cos rapaces e rapazas e os seus mestres e mestras unha sesión de 45 minutos que combina música en directo e maxia.

A programación arrancou o 4 de abril e desenvolverase ata o 15 de xuño, nun total de 24 centros educativos lucenses e no Hospital de Calde.

Trátase da quinta edición deste ciclo posto en marcha polo Concello, que permite aos máis cativos e cativas coñecer os diferentes instrumentos musicais e achegarse á música en vivo dun xeito lúdico, grazas á Escola e á Banda Municipal de Música.

Como broche de ouro a este ciclo, os vindeiros 14 e 15 de xuño, terán lugar no Auditorio Municipal Gustavo Freire distintos concertos.