O local social dos maiores do Sagrado Corazón acolleu este mércores a primeira xuntanza do Goberno de Lugo coa veciñanza para implicala nos Orzamentos Participativos, un proceso no que será a cidadanía a que decida en que e en onde investir os orzamentos municipais. Así, os lugueses e luguesas poderán, unha vez máis, decidir de forma directa o destino de 350.000 euros con cargo ao presuposto deste 2018.

Ao redor de 25 persoas participaron nesta primeira reunión, que presentou a Alcaldesa de Lugo, Lara Méndez, e na que tamén estivo presente a Concelleira de Concello e Cidadanía, Rosana Rielo.

Esta é a primeira fase dos orzamentos participativos, a recollida de propostas de diferentes investimentos de ata 15.000 euros, que estará aberta ata o 9 de setembro. Ademais desta ferramenta de participación, os veciños e veciñas poden facer chegar as súas ideas a través da web loop.lugo.gal [2] ou ben no Rexistro Xeral do Concello. Nesta fase pode participar calquera persoa empadroada en Lugo ou con vinculación co municipio, sexa por estudos ou traballos.

Tras esta reunión, o Goberno achegarase a outras barrios da cidade. O Concello informa destas reunións tanto na súa web www.lugo.gal [3] como nas redes sociais.

Obxectivos dos Orzamentos Participativos

Este proceso de participación veciñal persegue tres obxectivos fundamentais:

• Fomentar a participación a través dun exercicio público transparente, procurando a maior participación veciñal posible, que permita a vinculación activa das e dos lucenses co desenvolvemento local do seu municipio.
• Promover que a cidadanía non sexa simple observadora dos acontecementos e decisións, e que poida converterse en protagonista activa do que ocorre no seu municipio, tanto nas zonas  urbanas coma nas rurais; afondando así na democracia participativa.
• Mellorar a comunicación entre Concello e veciñanza, xerando espazos nos que achegar ideas que incentiven o consenso sobre a forma de como deben gastarse os recursos municipais, ao tempo que serve de instrumento para promover a solidariedade entre a cidadanía e os seus barrios.

Máis información en https://loop.lugo.gal/ [2]