A alcaldesa de Lugo, Elena Candia, presidiu hoxe a constitución do novo Comité de Dirección do PAI Novo Norte, o órgano encargado de adoptar as decisións estratéxicas para o desenvolvemento deste plan financiado con fondos europeos.

Durante a reunión realizouse unha análise da situación actual dos proxectos e marcáronse as principais prioridades do novo goberno municipal centradas en mellorar o abastecemento de auga nos polígonos industriais, avanzar na accesibilidade e conexión entre a estación intermodal e o centro da cidade, así como impulsar actuacións de mellora en instalacións municipais e espazos públicos.

Desde o goberno local destacan que o obxectivo é orientar os fondos europeos cara a proxectos que dean resposta a necesidades reais da cidade, melloren os servizos públicos e contribúan a facer de Lugo unha cidade máis competitiva, accesible e preparada para o futuro.