O Goberno local de Lugo vaise rebaixar o soldo e proporá a mesma medida ós grupos da oposición.

O Equipo de Goberno do Concello de Lugo, quere ser coherente co axuste contemplado nas medidas que anunciou hoxe no Congreso o Presidente do Goberno, José Luis Rodríguez Zapatero, para facerlle fronte á crise.

Á espera de coñecer en detalle o Real Decreto que aprobará o Goberno que prevén a diminución dos salarios dos funcionarios, o Concello de Lugo anuncia que recurtará tamén os salarios que perciben os membros do Goberno Local.

Deste xeito, o Concello de Lugo continúa coa súa política de austeridade. O Goberno local de Lugo lembra que xa ten posto en marcha diversas medidas neste sentido. Así, dende hai dous anos están conxelados os salarios dos políticos e altos cargos do Concello, conxeláronse os impostos co fin de que as familias lucenses dispoñan de máis cartos e tamén se levaron a cabo iniciativas para aforrar noutros gastos.

As medidas postas en práctica pola Concellería de Asuntos Xerais permitíronlle ó Concello aforrar un 25% na factura telefónica e un 50% en gasto de papel e consumibles.

Ademais, o Goberno local o tomou outras medidas de axuste como a redución dos Orzamentos municipais en case 15 millóns de euros, mantendo tanto o nivel de gasto social coma os investimentos, neste caso grazas ós fondos aportados polo Plan E.

Con este tipo de medidas o Concello de Lugo conseguiu pechalo último exercicio sen déficit.