O concelleiro de Desenvolvemento Local, Mauricio Repetto, supervisou este xoves a instalación de tres novos bancos na rúa Trapero Pardo, no barrio da Residencia. Esta actuación responde a unha petición realizada polos veciños e veciñas do barrio á rexedora lucense, Lara Méndez, e, polo tanto, busca dar resposta a unha demanda cidadá, ao tempo que se crean novos puntos de descanso e esparexemento nesta vía da cidade.

O barrio da Residencia enmárcase na zona DUSI, na que o Goberno de Lara Méndez, está a executar, con fondos FEDER, a estratexia Muramiñae, co obxectivo de unir a trama urbana da cidade co río Miño, para conseguir unha cidade máis cómoda, accesible e sostible. Unha das actuacións que inclúe esta estratexia é a posta en marcha dunha senda cicilista, de 14 quilómetros de lonxitude, que suporá ademais a creación dun novo aparcamento alternativo neste barrio lucense, concretamente na rúa Francisco Lamas López, á que se accede dende Trapero Pardo.