O Goberno de Lara Méndez, a través da Concellería de Benestar que dirixe Olga López, volve a apoiar este ano o Día Mundial da Saúde Mental -colaborando coa Fundación Salma- este próximo domingo, ás 19.00 horas, nunha iniciativa na que se convida á cidadanía a encher de cometas o ceo nas proximidades da Catedral co obxectivo de “normalizar esta enfermidade na nosa contorna”, explicou a edil.

Unha iniciativa que dende o Concello de Lugo se apoia, xa que “é moi importante visibilizar e sensibilizar ao conxunto da sociedade así como desestigmatizar sobre os problemas de saúde mental”, apuntou a concelleira, agradecendo o labor da Fundación Salma que “é esa man amiga que axuda a acompañar ás persoas afectadas”.

Neste punto, a edil apuntou que “o próximo 16 de outubro será outra xornada importante para concienciar sobre os problemas de saúde mental”, mostrando o compromiso do Concello nesta ocasión con Fundación Salma, e con todas as asociacións que traballan neste sentido “pois o seu labor é indispensable e complementa á que levan a cabo as administracións”, concluíu Olga López.

A Fundación Salma

É unha fundación sen ánimo de lucro que traballa para mellorar as condicións das persoas con problemas de saúde mental. A nosa misión é dotar a Galicia dun modelo de xestión integral e multidisciplinar en materia de atención sanitaria e asistencia social para a saúde mental: un sistema que poña no centro os dereitos humanos das persoas con problemas de saúde mental, que entenda a saúde mental como un factor de progreso social, que parta dende os centros de saúde de atención primaria, e que conte co respaldo legal, a asignación de recursos e a planificación necesarias para a súa xestión eficaz e continuada.