O plan de concentración de dispositivos municipais para abordar, dunha maneira integral, a limpeza dos barrios, posto en marcha pola alcaldesa, Lara Méndez, chegará este xoves, día 12, ao barrio do Sagrado Corazón, logo de concluír as tarefas previstas no Castiñeiro, Casás, Abella, A Residencia e As Gándaras.

Deste xeito, nas vindeiras xornadas o operativo integrado polas empresas encargadas do aseo urbano, da conservación das zonas verdes, así como do mantemento das áreas de xogos infantís -apoiadas por brigadas municipais- trasladarase ao barrio do Sagrado Corazón, onde se realizarán traballos de roce de vías e zonas verdes municipais, varrido e baldeo de rúas, limpeza de sumidoiros e illas de reciclaxe de lixo, así como arranxo de papeleiras, bancos e resto de mobiliario urbano.

O obxectivo deste plan, que executa o tenente de alcaldesa e edil de Medio Ambiente, Miguel Fernández, é unificar os esforzos e os recursos municipais por contornas e mellorar, así, o acondicionamento da cidade, sen descoidar o labor ordinario que se leva a cabo diariamente. “Trátase de concentrar recursos para incrementar a limpeza da cidade, para o que ademais pedimos a colaboración da veciñanza, porque a imaxe de Lugo é responsabilidade de todos”, subliñou Fernández.

Dende o ano 2020 o Concello de Lugo leva tramitados un total de 341 expedientes por acumulación de maleza en predios particulares, instando aos seus propietarios a corrixir esta situación; 12 deles precisamente no barrio do Sagrado Corazón. Tras rematar nesta contorna, os traballos continuarán en Galegos.

Audio

• O edil de Medio Ambiente, Miguel Fernández, sobre o Plan de Limpeza de Barrios | Descargar mp3 [1]