Comezan os concertos en familia do Festival de Música Cidade de Lugo que este ano aumenta a súa oferta a tres actividades que terán lugar a media tarde doutros tantos sábados no Círculo das Artes. O Corpus dos nenos deste ano terá como protagonista a Igor Stravinski e comeza mañá, sábado 26 de abril, ás 18:00 horas cun espectáculo, musical e teatral, sobor dunha das obras máis coñecidas do compositor ruso, a Historia do soldado.

Esta proposta está dirixida musicalmente polo director galego formado en Roma Joam Trillo e escenicamente polo experimentado director teatral coruñés Xosé Manuel Rabón. Xuntos foron responsables da ópera Bastián e Bastiana que os nenos puideron ver no festival do ano pasado e este ano prepararon este novo espectáculo baseado en contos populares rusos aos que Stravinski puxo música en 1918. Unha mistura de música, teatro e danza que contará coa participación do actor Lino Braxe, o tenor Diego Neira e o barítono Luís Martínez.

Estes concertos pensados para que os nenos poidan acudir acompañados por toda a familia continuarán o sábado 10 de maio (día no que o violinista albanés Florian Vlashi descubrirá moitos aspectos da historia e o son do violín) e o sábado 24 de maio (cando a compañía de monicreques Viravolta e o Trío Quidam ofrecerán o espectáculo con música de Ermitas García Ríos titulado O paxaro de lume).