O Primeiro Tenente de Alcalde e Concelleiro de Urbanismo e Medio Ambiente, Luis Álvarez, asistiu hoxe á clausura do Festival de Cine Turístico Art&Tur celebrado na  cidade portuguesa de Porto.

Luis Álvarez encabezou unha delegación lucense que asistiu a este festival sobre cine turístico para promocionar o Arde Lucus. No Edificio Douro Azul, sede do evento, permaneceu instalado nesta xornada un stand con información turistica do Concello de Lugo.

Ademais, viaxaron a Porto para promocionar a nosa cidade, xunto co Primeiro Tenente de Alcalde, representantes das asociacións do Arde Lucus como é o Senado, a Cohors III, Caetra Lucensium e a Guarda Pretoriana, que realizaron un desfile dende a Cámara de Porto ata o Edificio Douro Azul.

Na gala de entrega de premios, coa que rematou o Festival, entregóuselle ao documental Arde Lucus, dirixido por Brais Revaldería, o premio ao mellor documental dentro deste Festival. Con este motivo, o Concello de Lugo aproveitou esta importante oportunidade para facer unha promoción da cidade e da Festa do Arde Lucus.