Con este soporte de benvida, cun saúda da alcaldesa, pretende facilitar que as persoas que chegan á cidade dispoñan desde o primeiro momento e cun só clic a información sobre os recursos que Lugo ofrece, desde o patrimonio e a cultura ata a gastronomía, a natureza ou os museos.

A tarxeta distribuirase entre os establecementos hostaleiros, reforzando o papel destes profesionais como primeiro punto de contacto cos visitantes e como prescritores da cidade.

O soporte presentouse nun encontro con empresarios do sector. A alcaldesa de Lugo, Elena Candia, destacou a importancia de seguir dando pasos para mellorar a experiencia turística e avanzar cara a un modelo que permita desestacionalizar as visitas e aproveitar todo o potencial de Lugo ao longo do ano.

“O desenvolvemento turístico ten unha importancia enorme para a economía da cidade e para a creación de emprego. Temos recursos, temos patrimonio e temos moitas posibilidades”, sinalou a alcaldesa.

Candia destacou tamén a necesidade de poñer en valor o conxunto dos recursos da cidade, ampliando a oferta máis alá dos grandes eventos e referentes xa consolidados, como o Arde Lucus ou o San Froilán, e apostando tamén por ámbitos como os museos, o patrimonio cultural, a gastronomía, a natureza ou o Lugo termal.

O encontro serviu tamén para escoitar directamente as necesidades e propostas dos profesionais do sector, que trasladaron ao Concello cuestións como a necesidade de avanzar na desestacionalización turística, mellorar a coordinación e garantir unha información máis fluída entre o Concello e o sector.

Pola súa banda, o concelleiro de Turismo e Museos, Agustín Gallego, presentou a iniciativa baixo o lema “Lugo está de moda” e puxo o foco na colaboración cos profesionais do sector para seguir mellorando o posicionamento turístico da cidade. “Temos que escoitar ao sector, porque é quen está en contacto diario cos visitantes e coñece de primeira man as súas necesidades”, sinalou.

O edil manifestou que a nova tarxeta de benvida e a Guía Cultural e Turística forma parte da aposta municipal para facilitar o acceso á información, mellorar a experiencia dos visitantes e conseguir que descubran máis Lugo durante a súa estancia, favorecendo tamén que a cidade sexa recomendada como destino turístico.

 

• Agustín Gallego, sobre á oferta turística e cultural de Lugo | Descargar mp3 [1]