O Concello de Lugo informa de que a partir das 09.00 horas desta mañá a Área de Transición Ecolóxica procedeu ao peche dos parques da cidade ante a previsión da Axencia Estatal de Meteoroloxía da chegada dun fenómeno meteorolóxico adverso de nivel amarelo para a xornada de hoxe, por ventos de compoñente suroeste xirando a oeste ao mediodía, que poden deixar refachos de ata 70 quilómetros por hora e que afectarán ao centro da provincia de Lugo.

Dende Transición Ecolóxica explícase que operarios dos servizos municipais están a precintar os parques de Rosalía de Castro, Frigsa, Paxariños e Marcos Cela, quedando prohibida a entrada aos mesmos.

Ademais, faise un chamamento á cidadanía para pedirlle que respecten estas limitacións e que non se acheguen ata as zonas verdes municipais con arboredo ata que remita este temporal, evitando correr riscos innecesarios para non poñer en perigo a súa seguridade.