O Concello de Lugo iluminará esta noite, a partir das 23:00 horas, a fachada da Casa Consistorial de cor verde para secundar o Día Mundial da Esclerodermia a petición da Asociación Española desta enfermidade.

A esclerodermia é unha patoloxía rara e moi pouco coñecida entre a poboación, de carácter autoinmune que afecta ao tecido conectivo do organismo e produce cambios na pel; tamén pode producilos nos vasos sanguíneos, nos músculos e nos órganos internos. Afecta a tres de cada 10.000 persoas e máis ás mulleres que aos homes. A súa orixe é descoñecida mais considérase que un factor de risco para contraela é a exposición laboral ao po de sílice e ao policloruro de vinilo.

O Concello de Lugo súmase así ás reivindicacións do colectivo que escolleu o día 29 de xuño para visibilizar e recoñecer as dificultades daquelas persoas que viven coa esclerodermia e tentar conseguir melloras nos tratamentos e coidados co fin, tamén, de aumentar a conciencia pública e o entendemento entre as autoridades e institucións nacionais e internacionais sobre esta enfermidade.