A Alcaldesa de Lugo, Lara Méndez, dentro da súa rolda de encontros con colectivos sociais da cidade, mantivo este luns unha reunión coa presidenta da Federación Galega de Viúvas, Aurora Carro, e con representantes deste colectivo, constituído hai uns 40 anos para defender os dereitos e reivindicacións das mulleres viúvas en Galicia. A federación aglutina unhas 14 asociacións de diferentes lugares da comunidade galega.

No encontro, Méndez puxo en valor este movemento asociativo e fixo fincapé no seu traballo “comprometido e xeneroso”, ao tempo que avanzou o apoio do Concello á celebración en xuño en Lugo da XLIV Asemblea Nacional de Mulleres Viúvas, que volverá a acoller a cidade tras uns 15 anos. O obxectivo deste encontro, que cada ano se celebra nun punto diferente do territorio español, é o intercambio de experiencias e sensibilizar á sociedade da situación das viúvas e das súas familias. Galicia é a quinta comunidade autónoma con máis persoas viúvas en España, unhas 186.000 mulleres, 30.000 delas na provincia luguesa.

Neste senso, a rexedora mostrou a súa satisfacción por que Lugo sexa a sede deste encontro, que en anteriores edicións reuniu a un milleiro de mulleres de todo o país, “oportunidade que non podemos deixar escapar para promover o noso patrimonio histórico artístico, cultural e gastronómico”, asegurou Méndez.