O CEI Nodus, o Centro de Empresas e Innovación do Concello de Lugo, quere sacar o emprendimento á rúa e darlle unha maior visibilidade ao traballo que desenvolven as empresas alí instaladas así como incentivar a creación “dun ecosistema emprendedor que facilite e axude ás e os lucenses, especialmente á xente nova, a que emprendan os seus retos empresariais”, segundo sostivo o concelleiro de Desenvolvemento Local e Emprego, Mauricio Repetto, durante a supervisión, hoxe, ao espazo exterior das instalacións do CEI, que será mellorado e acondicionado.

A Xunta de Goberno local aproba hoxe o proxecto técnico das obras de recuperación da praza-xardín do CEI en Garabolos e a apertura do expediente de contratación desta actuación, cun importe de 96.368 euros, IVE incluído.

A zona, agora en desuso, converterase nun espazo “con vida”, segundo Mauricio Repetto, xa que se planificarán actividades periódicas para dar a coñecer o labor que os servizos do CEI pon a disposición das persoas que estean pensando en emprender, pero tamén servirá como espazo ‘pop up’ onde os emprendedores poidan amosar o seus proxectos, propostas, creacións, produtos e servizos.

“Tamén programaremos actividades culturais. A clave é que esta área exterior sexa un novo punto de encontro dos actores implicados na dinamización económica de Lugo”, mantén o concelleiro.

Audio

• O concelleiro de Desenvolvemento Local e Emprego, Mauricio Repetto, sobre o CEI Nodus | Descargar mp3 [1]