O alcalde de Lugo, Miguel Fernández, desprazouse á Rúa Catón para supervisar a finalización dos traballos de reparación do colector de saneamento situado nesta vía, unha actuación que permitiu resolver a incidencia detectada neste punto da rede municipal e actuar tamén sobre os danos que a avaría provocara no firme da calzada.

“Falamos dunha infraestrutura esencial para o funcionamento diario da cidade e, cando aparece unha incidencia deste tipo, é fundamental actuar con rapidez e con rigor técnico para garantir o correcto funcionamento do sistema”, explicou o rexedor, quen subliñou que esta intervención forma parte do traballo continuo do Goberno local para manter en bo estado as redes e servizos básicos municipais.

Os traballos puideron executarse unha vez que o descenso do caudal do Río Rato permitiu acceder con seguridade ao punto da incidencia, resolvendo así unha actuación necesaria para garantir o correcto funcionamento da rede de saneamento neste ámbito da cidade e mellorar as condicións da propia vía.