O concelleiro de Medio Rural anunciaba hoxe o inicio da conta atrás para que o núcleo de Penarrubia e a parroquia de Bocamaos dispoñan dunha rede de abastecemento propia.

“Esta semana levaremos á Xunta de Goberno a aprobación da contratación destas obras, comprometidas hai tempo e que, queremos, se materialicen canto antes para cumprir cunha demanda social á que nos parece de xustiza dar resposta pola importancia que ten dotar deste servizo á veciñanza do rural que, en moitos puntos do termo municipal, só se fornece aínda de pozos particulares”, asegurou Miguel Fernández.

O edil responsable de área indicou que a adxudicación dos traballos se licitará de forma independente para cada un dos dous proxectos, de maneira que o primeiro se estima nun total de 104.491’73€ e terá un prazo de execución de tres meses pola complexidade que presenta a obra e, o segundo, cun custo de 154.201’54€, deberá estar finalizado en tan só 60 días. Ámbolos dous serán sufragados con cargo ao Plan Único da Deputación Provincial.

“O obxectivo é ampliar a rede de saneamento existente de forma que coa actuación prevista en Penarrubia se complete o abastecemento de todo o núcleo de Orbazai, mentres que a de Bocamaos axudará a estender a cobertura da traída á parte noroeste do municipio, logo de tela rematada xa na zona de Meilán”, explicou Miguel Fernández ao tempo que avanzou que o seu departamento atópase realizando neste momento unha memoria valorada doutras intervencións coa idea de executalas á maior brevidade posible.

Audio

• O concelleiro de Medio Rural, Miguel Fernández, sobre a construción da rede de abastecemento | Descargar mp3 [1]