A Alcaldesa de Lugo, Lara Méndez, e o Voceiro municipal, Miguel Fernández, recibiron este venres no Salón de Plenos a medio cento de estudantes de Alemaña, Francia, Bulgaria, Romanía e Croacia, que están de intercambio no instituto Virxe dos Ollos Grandes e que viñeron acompañados de mestres dos respectivos países.

A rexedora convidou aos rapaces e rapazas “a coñecer e a gozar da nosa cidade e de todos os seus atractivos turísticos, así como a aproveitar a experiencia do intercambio entre alumnos lucenses e europeos”. Ao finalizar a benvida, houbo un intercambio de agasallos.

Os alumnos, que cursan estudos de bacharelato e ciclos formativos, tiveron ocasión de coñecer hoxe a Casa do Concello e onte visitaron as instalacións do CEI-Nodus, onde foron recibidos pola Concelleira de Economía, Emprego e Desenvolvemento Económico, Ana Prieto, quen lles explicou os servizos de fomento do emprego e do emprendemento que presta a entidade local.