A Alcaldesa de Lugo, Lara Méndez, o Vicepresidente da Deputación, Álvaro Santos, e representantes das asociacións Aliad Ultreia, Cáritas e Bonhomía, concentráronse este venres na Praza Maior no Día Internacional contra a Explotación Sexual e Trata de Persoas. No acto tamén estiveron presentes os Concelleiros de Benestar Social, Igualdade e Inclusión; Deportes e Medio Rural e Educación e Infraestruturas Urbanas, Ana Abelleira, Miguel Fernández e Manuel Núñez, respectivamente.

No acto, no que se presentou un spot realizado pola Fundación TIC para concienciar desta lacra que se incrementou de forma alarmante nos últimos anos, a rexedora pediu a implicación de administracións e sociedade para traballar contra esta problemática, tomando como exemplo a política que se sigue nos países nórdicos, onde se castiga ao cliente para loitar contras as redes e o proxenetismo.

Segundo as Nacións Unidas estímase en 2,5 millóns o número de persoas vítimas de trata. Con todo, calcúlase que por cada vítima de trata de persoas identificada existen 20 máis sen identificar. A metade das vítimas de trata son menores de 18 anos, concretamente do 15 ao 20% das vítimas son nenos.