O Concello de Lugo súmase un ano máis á Hora do Planeta este sábado, 30 de marzo, e apagará a iluminación pública da Muralla, a Catedral e a Casa Consistorial, dende as 20:30 ás 21:30 horas, simbolizando así o compromiso da entidade local coa convocatoria promovida pola organización internacional WWT contra o cambio climático, a maior iniciativa global en defensa da natureza, e apoiada por Nacións Unidas.

A entidade local convida á veciñanza a sumarse a esta iniciativa cun pequeno gran xesto como apagar a luz unha hora o sábado tarde, co que todos poderán contribuír de xeito simóblico á defensa do medio ambiente, unha responsabilidade de toda a sociedade.

Neste 2019 cúmprense 12 anos dende a primeira edición da Hora do Planeta, realizada en Sidney, cando 2,2 millóns de persoas apagaron as luces como unha chamada á accción fronte ao cambio climático. Este movemento, que empezou nunha sola cidade estendeuse xa a 188 países.