Lugo acollerá no verán de 2017, concretamente en xullo, a duodécima edición dos Xogos do Eixo Atlántico Noroeste Peninsular, que reunirá na cidade a unhas 5.000 persoas. Así o anunciou este xoves a Alcaldesa, Lara Méndez, tras participar na comisión executiva do Eixo Atlántico, que se reuniu hoxe na localidade lusa de Viana do Castelo.

A rexedora anunciou que a candidatura da provincia luguesa, liderada por Lugo e da que forman parte os concellos de Sarria e Monforte, gañou entre un total de 5 propostas, co apoio maioritario polos membros da comisión. Trátase dun evento que está dirixido á promoción do deporte e á convivencia entre os máis novos, posto que reúne a rapaces e rapazas deportistas de máis de 30 localidades de Galicia e do Norte de Portugal, para disputar campionatos de fútbol, balonmán, baloncesto, voleibol, ximnasia rítmica, atletismo e atletismo adaptado, e natación e natación adaptada, ao tempo que se mellora o coñecemento entre os cidadáns das dúas rexións.

Para a Alcaldesa acoller este evento trasfronteirizo supón un importante pulo para Lugo “de cara á promoción da nosa cidade, á busca de cohesión territorial e á dinamización da zona interior da Eurorrexión”.

“Lugo é sen dúbida algunha unha cidade volcada co deporte e cos valores que inculca a súa práctica, unha cidade que apoia o deporte de elite pero que tamén coida o deporte de base”, subliñou a rexedora, quen fixo fincapé no deporte como unha ferramenta de cohesión social. “Confío nos recursos da cidade para acoller os Xogos do Eixo e para garantir a atención deportiva merecida aos 2.000 particpantes, o que contribuirá notablemente na proxeción nacional e internacional que quero e busco para a cidade”, asegurou a Alcaldesa.