A Alcaldesa de Lugo, Lara Méndez, clausurou este sábado o I Congreso Provincial para Pacientes con Cáncer y su Entorno Familiar, organizado polo colectivo SOMOS Unidos por el Cáncer coa colaboración do Concello de Lugo no Centro de Artesanía e Deseño (CENTRAD). Trátase dunhas xornadas que pretenden convertirse nun punto de encontro para os pacientes de cancro, familiares e profesionais, no que se busca compartir experiencias e mellorar a información sobre os diferentes aspectos que abarca o cancro, unha enfermidade da que no pasado ano 2014 se diagnosticaron en España 241.284 tumores. Tras a última conferencia os participantes achegáronse á Muralla, que lucía de amarelo, cor característica deste colectivo que leva un ano traballando en Lugo para sensibilizar sobre o cancro.

No acto, no tamén estivo presente o presidente de SOMOS, José Manuel Vázquez e o deputado de Promoción Económica e Social, Álvaro Santos, a rexedora reivindicou unha sanidade pública, gratuíta, universal e de calidade. “A crise non pode ser excusa para frear a inversión sanitaria”; afirmou Lara Méndez, quen fixo fincapé na repercusión de contar coas partidas orzamentarias necesarias para non facer perigar a atenicón e as medidas de prevención. “Non debe haber discriminación algunha nas prácticas de detección temperá nin nas terapias paliativas, que se deben garantizar a toda a cidadanía con criterios de igualdade, equidade e suprimindo os copagos.

Neste senso, a Alcaldesa avanzou o apoio do Concello á investigación, fundamental para avanzar nos métodos de diagnóstico e na mellora de tratamentos de acceso gratuíto.