A alcaldesa de Lugo, Lara Méndez, e o concelleiro de Deportes, Mauricio Repetto, recibiron hoxe a máis dun centenar de deportistas lucenses que participarán na 14 edición dos Xogos do Eixo Atlántico, do 4 ao 8 de xullo en Maia. O municipio, como membro da entidade, financia a viaxe dos participantes.

Máis dun centenar  de deportistas, nados entre o 2006 e o 2009, foron seleccionados polos distintos clubs de Lugo nas diferentes modalidades de fútbol, balonmán, baloncesto, voleibol, atletismo e natación. Méndez destacou que “en Lugo existe un forte arraigo da práctica deportiva dende idades temperás, é sen dúbida algunha unha cidade volcada co deporte e cos valores que inculca a súa práctica, unha cidade que apoia o deporte de elite pero que tamén coida o deporte de base”.

A rexedora explicou que “o deporte é unha ferramenta de cohesión social, e a vosa participación na 14 edición dos Xogos do Eixo Atlántico contribuirá notablemente na proxección nacional e internacional da nosa cidade”.

A 14 edición dos Xogos do Eixo Atlántico é un evento dirixido á promoción do deporte e á convivencia entre os máis novos, que reúne a rapaces e rapazas deportistas de máis de diferentes localidades de Galicia e do Norte de Portugal. En total, nos xogos participarán 2.400 deportistas de 28 localidades.