A alcaldesa de Lugo, Lara Méndez, acompañada do concelleiro de Deportes e Xuventude, Mauricio Repetto, participou este sábado na inauguración dos XXV Xogos Autonómicos de Baloncesto ‘Special Olympics Galicia’ para persoas con discapacidade intelectual, que acolle o Polideportivo Municipal Casa do Deporte e no que participan uns 75 deportistas pertencentes a 7 asociacións de toda Galicia.

Lara Méndez subliñou que “é un orgullo para Lugo acoller unha competición tan importante coma esta, coa que contribuímos a rachar estereotipos e prexuízos, ao tempo que promovemos a inclusión real das persoas con diversidade funcional a través do deporte, demostrando que, co apoio necesario, poden acadar todas as metas e obxectivos que se propoñan”.

A rexedora desexou unha boa competición a todos os participantes e destacou a ampla representación lucense pois “o 75% dos deportistas son da provincia de Lugo, o que supón unha dobre satisfacción”. Así mesmo, felicitou aos deportistas, por “ser o mellor exemplo de superación”, así como aos organizadores, a asociación Special Olympics Galicia, “pola iniciativa e o traballo diario que realizan en aras de acadar unha inclusión plena das persoas con discapacidade intelectual”.

Sete asociacións de diferentes cidades galegas estarán representadas nesta 25ª edición, entre elas a anfitriona, Aspnais, que participa con 11 atletas nas probas individuais. O colectivo Prodeme de Monforte conta co maior número de deportistas, 15 en total, mentres que  San Vicente de Lugo, competirá con 12, Aspanane de Viveiro, traerá a 8 deportistas, San Francisco de Vigo participará con 9 e Asfaval e Aspanas de O Barco e Ourense participarán con 5 e 12 deportistas respectivamente.

O obxectivo é fomentar as capacidades persoais de cada participante, potenciando características como a iniciativa, o liderado, a cooperación, o valor e o autodominio, o que se traduce nunha mellora da confianza e amor propio da persoas con discapacidade intelectual.