O alcalde de Lugo, Miguel Fernández Méndez, presentou esta mañá en rolda de prensa o concerto que o pianista James Rhodes ofrecerá o vindeiro 19 de novembro, ás 20:00 horas, no auditorio Fuxan os Ventos, como parte do programa conmemorativo polo 25 aniversario da declaración da Muralla de Lugo como Patrimonio da Humanidade pola UNESCO.

Durante a súa intervención, o rexedor destacou que “estamos a celebrar unha data que vai moito máis alá dun aniversario. Falamos dun recoñecemento internacional que puxo a Lugo no mapa cultural do mundo, que reforzou o noso orgullo colectivo e que nos lembra cada día o valor de vivir nunha cidade que soubo coidar e preservar o seu patrimonio”.

As entradas para o concerto estarán dispoñibles desde hoxe, ás 12:00 horas, a través da web entradaslugo.es, cun prezo simbólico de 10 euros, co obxectivo de que “a cultura siga sendo accesible para todos e todas”, explicou o alcalde.

Fernández sinalou que “estes 25 anos son, sobre todo, unha oportunidade para mirar cara ao futuro con ilusión, coidando o que somos e apostando pola cultura, pola educación e pola convivencia”. Nese sentido, enmarcou o concerto de James Rhodes como “unha das citas máis destacadas do programa conmemorativo”, que inclúe máis de quince actividades culturais, deportivas e sociais.

O rexedor salientou que James Rhodes é un artista que encarna á perfección o espírito desta celebración, definíndoo como “un creador comprometido, valente e profundamente humano. É un dos pianistas máis recoñecidos do panorama internacional, pero tamén un divulgador que soubo reinventar o concerto clásico, achegándoo a novas xeracións e converténdoo nun espazo de encontro e emoción compartida”.

Nos seus recitais, o músico británico combina interpretación e palabra, achegando o público á música de compositores como Bach, Chopin, Brahms ou Rachmaninov, e compartindo como a música foi para el “unha maneira de atopar luz nos momentos máis difíciles”.

Ademais da súa traxectoria artística, Fernández lembrou que Rhodes é un cidadán comprometido coa sociedade española, impulsor da coñecida Lei Rhodes de protección á infancia fronte á violencia e divulgador cultural.

“Traer a James Rhodes a Lugo é moito máis ca programar un concerto: é apostar por unha maneira de entender a cultura como ferramenta de transformación social e emocional. É abrir as portas da nosa cidade a un artista internacional que comparte os valores que defendemos: a empatía, a liberdade e a esperanza”, subliñou o alcalde.

O programa conmemorativo do 25 aniversario prolongarase ata o 30 de novembro, e inclúe concertos, teatro, danza, espectáculos de rúa, o desfile histórico do Arde Lvcvs e un gran espectáculo de drons sobre o parque Rosalía de Castro, creado especialmente para esta efeméride coa música de Abraham Cupeiro.

Fernández Méndez agradeceu a colaboración de entidades, colectivos e artistas locais que fixeron posible este programa, destacando que “a Muralla de Lugo non é só pedra e historia; é identidade, é memoria e é futuro. E coa emoción que traerá James Rhodes, seguimos dicindo ao mundo que Lugo é unha cidade viva, orgullosa, culta e aberta”.

Audio

• O alcalde de Lugo, Miguel Fernández Méndez, sobre o concerto do pianista James Rhodes | Descargar mp3 [1]