A máxima responsable do departamento educativo galego explicou que o novo Centro de Formación Profesional permitirá “redistribuír a oferta das familias profesionais de Lugo

A conselleira de Educación e Ordenación Universitaria, Laura Sánchez Piñón, visitou esta mañá, acompañada pola Concelleira de Educación, Dolores Vieiro, os Institutos de Educación Secundaria (IES) A Piringalla e Ánxel Fole de Lugo, onde puido coñecer as obras realizadas pola Administración educativa nestes centros, cun investimento de máis de 1 millón de euros. Ademais, Sánchez Piñón anunciou que Educación destina en 2007 ao redor de 10 millóns de euros para obras na provincia de Lugo, e afirmou que neste momento se están a estudar as necesidades do novo Centro Integrado de Formación Profesional de Lugo, co fin de definir a oferta e as familias profesionais que se impartirán no mesmo. Este centro, que este ano conta cun investimento de 1 millón de euros e que incluirá a oferta regrada, ocupacional e continua da FP; permitirá, en palabras da conselleira, "redistribuír a oferta das familias profesionais de Lugo". Durante a visita, a conselleira estivo acompañada do secretario xeral da Consellería, Benito Fernández; así como do delegado provincial de Educación, José Rábade.

No IES Ánxel Fole, Laura Sánchez Piñón puido coñecer o resultado das obras de substitución da cuberta do centro, cun investimento de 344.000 euros. Ademais, a conselleira de Educación e Ordenación Universitaria, tivo a ocasión de visitar a aula de informática, a biblioteca e o salón de actos do edificio; e mantivo un encontro cos docentes do centro. No IES estudan na actualidade un total de 585 alumnos e alumnas; 382 na ESO; e 203 en bacharelato.

A continuación, a máxima responsable do departamento educativo galego trasladouse ao IES A Piringalla, que tamén foi obxecto dunha obra de ampliación e de substitución da cuberta. A Administración educativa destinou un total de 702.050 euros para esta actuación. A obra comprende a ampliación do edificio, a través da construción de dúas aulas na primeira planta, e 3 na segunda. A superficie útil ampliada na primeira planta é de 115,67 metros cadrados; mentres que na segunda é de 211,01. Ademais, tamén se azulexaron os corredores nas aulas destas dúas plantas; e o acceso principal da fachada e a escaleira de emerxencia revestíronse con pintura acrílica.

En A Piringalla estudan máis de 900 alumnos. En concreto, 227 cursan a Educación Secundaria Obrigatoria, 70 bacharelato, e 616 ciclos formativos. A máxima responsable do departamento educativo galego subliñou ademais que este centro conta cun ciclo medio de sistemas informáticos implantado este curso, que vén a cubrir unha vella demanda dos estudantes deste municipio.

Dos 10 millóns que a Administración educativa inviste na provincia, un total de 1.270.000 euros destínanse á construción de pistas de atletismo na cidade cultural, que benefician ao alumnado do IES Nosa Señora dos Ollos Grandes e Lucus Augusti. Ademais, a Consellería destina 450.000 euros en obras de mellora no IES Río Miño, de Rábade.

A Administración educativa achegará ademais 2.200.000 euros á construción dun novo aulario no IES de Monterroso e realizará diversas obras de mellora nos IES Nosa Señora dos Ollos Grandes de Lugo (630.000 euros); no Porta da Auga de Ribadeo (1.100.000 euros); e no Sanxillao de Lugo (100.000 euros).

Así mesmo, a delegación de Educación de Lugo, dentro do RAM (obras de Reforma, Ampliación e Melloras) destina un total de 3 millóns aos centros da provincia, 1,5 a centros de primaria, e outro tanto a actuacións en centros de secundaria.