A alcaldesa de Lugo, Elena Candia, xunto con outros membros da Corporación municipal —o concelleiro de Turismo, Agustín Gallego, e os edís do PSOE Miguel Fernández e Ana Abelleira— recibiron esta mañá na Casa do Concello ao lucense Héctor Salvador, que recentemente recibiu a Gran Cruz ao Mérito Naval con distintivo branco, un dos maiores recoñecementos que concede a Armada Española.

Durante o encontro, a alcaldesa felicitou a Héctor Salvador pola súa traxectoria profesional no ámbito da exploración mariña e polo prestixio internacional acadado grazas ao seu traballo como piloto de somerxibles e participante en expedicións científicas de relevancia mundial.

Elena Candia avanzou ademais que o Concello impulsará un ciclo de charlas en institutos de Educación Secundaria e centros de Formación Profesional baixo o título “Novos camiños profesionais”, unha iniciativa que será inaugurada polo propio Héctor Salvador.

O obxectivo deste programa será achegar ao alumnado referentes vinculados a profesións e ámbitos pouco habituais, contribuíndo así a ampliar horizontes formativos e laborais entre os mozos e mozas de Lugo.

Héctor Salvador foi o primeiro español en descender á fosa das Marianas, o punto máis profundo do planeta, formando parte dun proxecto internacional no que se desenvolveu tecnoloxía pioneira capaz de acceder repetidamente a grandes profundidades mariñas.

A Gran Cruz ao Mérito Naval recoñece tamén a colaboración altruísta prestada á Armada, poñendo ao seu servizo a súa experiencia e coñecementos técnicos no ámbito da exploración submarina.

A alcaldesa destacou “o orgullo que supón para Lugo contar cun referente internacional como Héctor Salvador, que leva o nome da nosa cidade por todo o mundo a través do talento, da innovación e do compromiso”.