A Praza Maior, fronte ao Concello de Lugo, encheuse un ano máis de paraugas de cores para celebrar o Día Internacional das Persoas con Discapacidade, nun acto no que participaron concelleiras e concelleiros da Corporación Municipal, para acompañar aos distintos colectivos e asociacións lucenses que traballan pola inclusión e por unha sociedade plural e igualitaria, con oportunidades para as persoas con discapacidade. As e os edís do Concello de Lugo acompañaron aos case vinte colectivos presentes na lectura do manifesto e a multitude de nenos e nenas de varios centros escolares nunha actividade que hoxe chegou a súa décima edición co lema “Baixo o mesmo paraugas”, co obxectivo de reivindicar unha sociedade máis diversa, que aposte pola integración e pola igualdade de todas e todos.