Este venres, a Corporación municipal de Lugo participou nos tradicionais actos conmemorativos da festividade de San Roque, unha celebración que se mantén viva na cidade dende o ano 1768. A delegación, encabezada polo tenente de alcaldesa e concelleiro de Transición Ecolóxica, Miguel Fernández, xunto coas concelleiras Olga López Racamonde e Ángeles Novo, partiu en formación dende a Casa do Concello.

Acompañados pola Garda de Gala, percorreron as rúas do Centro Histórico ata a Capela de San Roque, onde tivo lugar a misa en honra do Santo. Esta tradición remóntase ao século XVIII, cando Lugo, afectada por unha grave epidemia de peste, realizou un voto a San Roque, protector contra as pestes, rogándolle a súa intercesión para poñer fin á traxedia. Desde entón, a cidade vén cumprindo anualmente con esta promesa como parte da súa historia e identidade.

Con este acto, o Concello reafirma o seu compromiso coa preservación das tradicións locais, mantendo viva unha práctica histórica que forma parte da memoria e cultura de Lugo.