O Concello vén de sacar a contratación a ampliación dos parques infantís da praza de Campo Castelo e de Albeiros, cun investimento total de 114.000 euros. De feito, este mércores publicouse na Plataforma de Contratación do Sector Público o anuncio de licitación, por un período de 15 días naturais, finalizando o prazo de presentación de ofertas o 8 de novembro, estando prevista a súa apertura o 9 de novembro.

No caso de Campo Castelo, o proxecto consiste na creación dun novo parque infantil específico para nenos e nenas de ata 3 anos xunto ao actual espazo de xogos. Terá unhas dimensións de 5,3 por 10 metros, e incluirá diversos elementos de xogos infantís, como saltadores, balancín, un castelo con tobogán e unha casiña. O orzamento é de 25.000€ e o prazo de execución de 30 días.

En Albeiros ampliarase a zona de xogos existente, tanto na parte para nenos de 0 a 3, como na destinada aos de maior idade. Incluiranse xogos como un circuíto de habilidades, columpios, carrusel xiratorio inclusivo, casiña de xogos con paneis didácticos, entre outros. Neste caso, procederase a maiores á mellora do espazo de lecer existente, coa reparación do pavimento e do céspede artificial, a colocación dunha valla de madeira e o acondicionamento e repintado dos propios xogos. O presuposto ascende a 89.000€ e o prazo de execución a 60 días.

O Plan de Barrios do Goberno inclúe estas actuacións de ampliación, que dan resposta a distintas peticións veciñais, dada a gran influencia de nenos e nenas nestes recintos, o que fai que queden a miúdo pequenos. Deste xeito, o equipo de Lara Méndez garante aos máis cativos e cativas e ás súas familias máis espazos de lecer na cidade, máis cómodos e máis seguros.

Audio

• Piñeiro, Parques Infantís | Descargar mp3 [1]