A Concelleira de Cultura, Turismo, Xuventude e Promoción da Lingua, Carmen Basadre, e o presidente da Sociedade Micolóxica Lucus, Julián Alonso, presentaron este venres no Salón de Plenos a XIV Exposición de Cogomelos, que acollerá o colexio Rosalía de Castro o vindeiro 8 de novembro. O Concello colabora con esta “inciativa máis que consolidada e de gran importancia”, tal e como a definiu Basadre, cunha achega económica de 1.800 euros, posto que se enmarca na súa aposta por impulsar a comercialización dos produtos autóctonos como vía para favorecer o desenvolvemento económico do municipio.
No acto, a Concelleira fixo fincapé nas posibilidades do territorio de Lugo no eido da micoloxía ao tempo que lembraba que o 80% do territorio do municipio é superficie rural. Neste senso, Basadre puxo en valor a producción de cogomelos no municipio e na provincia luguesa, “un recurso forestal que debemos aproveitar tanto dende o aspecto económico como culinario e ecolóxico”. A Concelleira tamén aproveitou a ocasión para impulsar a labor que realiza a Sociedade Micolóxica Lucus, que traballa pola promoción e divulgación dos cogomelos.

Pola súa banda, Alonso agradeceu a colaboración do Concello para celebrar un ano máis este encontro, ao tempo que convidaba a todos os lugueses a achegarse ao colexio Rosalía de Castro o domingo 8 de novembro.

Horarios

A XIV Exposición de Cogomelos estará aberta de 11:30 a 14:00 horas e de 15:30 a 20:00 horas. A entrada é totalmente gratuíta. Nesta edición poderán observarse ao redor de 250 especies diferentes, que estarán acompañadas por unha ficha técnica da especie en cuestión, onde se indicarán datos como o seu hábitat ou a súa toxicidade.

Audio

• Carmen Basadre, sobre a XIV Exposición de Cogomelos |Descargar mp3 [1]