A edil de Cohesión Social e Territorial, Ana González Abelleira, visitou a parroquia de San Vicente do Veral para comprobar o avance das obras de substitución dunha obra de paso no Rego de Pías. Durante a supervisión, estivo acompañada por representantes veciñais, cos que compartiu os detalles da intervención, que busca mellorar a conectividade da zona e reforzar a seguridade viaria tanto para vehículos como para peóns. Esta actuación está incluída no Plan Deputación 2024, un programa de investimentos destinado á mellora das infraestruturas municipais. Atendendo ás demandas trasladadas pola veciñanza, tamén se procederá á ampliación das biondas co obxectivo de optimizar as condicións de seguridade no paso.

A actuación, cun investimento de máis de 35.000 euros, inclúe a colocación dun novo tubo de 1.800 milímetros de diámetro, a reposición do firme con zahorra e a pavimentación posterior con triple rega asfáltica. "Este tipo de melloras son esenciais para garantir unhas infraestruturas modernas e duradeiras que respondan ás necesidades do rural", subliñou González Abelleira.

Ademais, a concelleira acompañou aos veciños a visitar outras actuacións executadas en resposta ás súas solicitudes, como a instalación de puntos de luz en Soñar, a limpeza de cunetas na vía que conecta Penarrubia e Adai, así como diversas melloras complementarias na canalización de augas, colocación de sumidoiros e instalación de reixas para a correcta evacuación da auga.

Audio

• A concelleira Ana González Abelleira supervisa o avance das obras en Veral xunto a representantes veciñais | Descargar mp3 [1]