Comunicado Oficial do Concello de Lugo ante a sentenza do PXOM
O Goberno de Lugo, coñecedor no día de hoxe da Sentenza do Tribunal Superior de Xustiza de Galicia sobre o recurso contencioso-administrativo interposto pola Asociación Cultural na Defensa do Parque de Rosalía contra a aprobación definitiva do Plan Xeral de Ordenación Municipal, celebra que o Tribunal acollera o alegato do Concello sobre a improcedencia de alegar en trámite de conclusións cuestións novas que non foron plantexadas inicialmente na demanda.
- Tema
- Urbanismo,
- Normativa urbanística
Do mesmo xeito, subliña que a inadmisibilidade é en relación co tema dos ríos, que entende que forman parte do 5% sen aprobar, segundo o Fundamento de dereito Quinto desta Sentenza.
Así mesmo, destaca a adecuación a dereito da memoria e estudo económico financeiro e sobre todo, en relación á proxección de poboación e ao respecto do principio de desenvolvemento sostible e reparto de cargas e beneficios que son salvados expresamente.
Quere tamén pór de manifesto a apreciada falta de lexitimación da asociación para plantexar impugnacións de cuestións axenas aos seus obxectivos.
En canto ao que se refire á Unidade de Actuación CS5, é un asunto complexo, tanto que o Concello estuda a posibilidade de pedir unha aclaración de sentenza sobre o fundamento undécimo. Aínda así, e con relación a esta unidade de actuación, a posición do Goberno está clara e manifestada dende que se presupostan 300.000 euros para a demolición do Garañón.