Esta semana deron comezo os traballos de reposición de pavimento no Pavillón Municipal de Frigsa por un importe de 52.114’38 euros (63.058’40€ IVE incluído).

“En total son 1.050 metros cadrados de superficie que se substituirán con prefabricado de caucho flotante, adecuado ás esixencias deportivas actuais e adaptado á normativa vixente, aportando seguridade e confortabilidade ás persoas que empregan estas instalacións”, indicou Miguel Fernández.

O edil de Deportes recorda que o firme destas dependencias, ubicadas ao carón das piscinas cubertas, presentaban un elevado grao de deterioro, proporcional ao uso que se fai das mesmas, e que se pretende atallar agora coa súa renovación para dotalas de maior seguridade.

“Non debemos esquecer que se trata dun equipamento que acolle as escolas de baloncesto, o entrenamento dos clubes así como as competicións a todos os niveis, ademais de actividades de ximnasia rítimica e deporte para maiores o que, en total, suma máis de mil usuarios”, aclarou o concelleiro.

Miguel Fernández referiu tamén que a obra, que se agarda remate en torno ao 20 de novembro, está financiada con fondos procedentes da Deputación a través dun convenio interadministrativo de cooperación asinado entre o organismo provincial e o Concello de Lugo.

Audio

• Miguel Fernández, sobre a reposición de pavimento no Pavillón Municipal de Frigsa | Descargar mp3 [1]