A Concelleira de Cultura, Turismo, Xuventude e Promoción da Lingua, Carmen Basadre, presentou esta mañá as actividades que se enmarcan dentro do programa Ponte en Lugo e que recolle a II Feira de Outono e o programa Constrúe co Corazón da Asociación Corazóns Solidarios.

Carmen Basadre destacou que “tratamos de que os veciños e veciñas que se quedan na cidade teñan alternativas e poidan realizar actividades fóra do común e fomentar o comercio local”. Desta maneira a Concellería de Cultura organizou un programa de actividades de lecer que combina a promoción de produtos agrícolas propios da terra, a artesanía tradicional e obradoiros de fomento do exercicio físico e hábitos de vida saudable. Baixo o nome de Ponte en Lugo 2012, estas accións desenvolveranse entre o 6 e o 16 de decembro nunha carpa situada na Praza da Soidade.

Durante as dúas fins de semana, celebrarase a II Feira de Outono que, ademais de ofrecer un tempo de lecer a lucenses e a turistas, persegue unha finalidade aínda máis ambiciosa que é a de promocionar os produtos da terra e a artesanía tradicional galega, pois proporciona aos produtores e mestres artesáns unha plataforma de presentación e venda dos seus produtos dun xeito directo, sen intermediarios. Este tipo de iniciativas favorece o consumo responsable, estimula a economía local ao difundir a actividade dos pequenos produtores e proporciona o coñecemento da calidade dos produtos galegos por parte do consumidor.

Este mercado celebrarase os días 6, 7, 8, 9, 15 e 16 de decembro en horario de 11:00 a 14:30 horas e de 16:30 a 21:00 horas. Cada día, unha media de 25 expositores albergarán os mellores produtos da terra e de artesanía. Os visitantes, ademais de mercar, poderán degustar saborosos queixos, doces e outras exquisiteces e observar a distintos mestres artesáns traballando en vivo nas súas creacións.

Para a organización desta Feira de Outono, tívose en conta que esta semana do alto outono coincide coa matanza do porco e coa época da recollida da castaña. Entre os expositores figuran produtores ecolóxicos de queixos, froitas e verduras; artesáns de distintas disciplinas; un produtor de Pan de Cea e Asoporcel.

Constrúe co corazón
Durante o 10 e o 11 de decembro, a carpa acollerá actividades gratuítas e para toda a familia que promoverán a creatividade e os hábitos saudables. Así, o luns e o martes a Asociación de Corazóns Artesáns celebrará unhas xornadas de fomento da creatividade e de aproximación á cestaría.

Trátase do remate das pezas realizadas nos obradoiros do Parque de Rosalía durante o San Froilán e da montaxe dunha exposición coas pezas. A actividade chámase "Constrúe co corazón" e está aberta a todo o público que desexe participar. Algunha delas teñen grandes dimensións como as casiñas xigantes, polo que vai resultar moi vistosa.