A Alcaldesa de Lugo,  Lara Méndez, supervisou as obras de asfaltado da Ronda da Muralla, entre San Roque e Bispo Odoario, que acometeron máis dunha vintena de operarios entre a noite do mércores ao xoves e a pasada noite, para minimizar as molestias aos condutores e peóns.

O Concello levou a cabo as actuacións de mellora da Ronda da Muralla, que contan cun orzamento total de 208.000 euros, en varias fases para poder garantir a mobilidade. Deste xeito, estableceu tres tramos, entre a Rúa San Roque e a metade da Praza Asturias, entre a outra metade da Praza Asturias e a Avenida da Coruña e un terceiro entre a Avenida da Coruña e a Praza Bispo Odoario.